مره يااخوان رحت لجده اتمشى انا واخوياي الثنين رامي وعلاء <<< الله من زين الاصدقاء
المهم قالوا ورى مانركب قارب كبير نتمشى فيه بالبحر
رحنا قصينا تذاكر ب25 ريال وركبنا
المهم معنا عالم وبشريه وعوائل
وانا مسوي فاهم جاي على طرفه القارب
وحاط رجليني برا كني مرهي على الموضوع
ماحسينا الا بذيك الرجفه والقارب يتقلب كنه مفقوع عليه الكفر وهو يمشي 160 كم
واللي يتمسك بالحبل واللي يتمسك برجليني يحسبها حبل
المهم هدأت العاصفه <<< من وين جت العاصفه
ومادريت الا انا على طرف شاطئ هادي مع شروق الشمس
واناظر والقى اصدقاي واحد يمين وواحد يسار مغمى عليهم
وجنبي بالضبط قاروره فيها ورقه صغيره
وافتح القاروره والقى خريطة كنز مكتوب فيها ...
امش قدامك ثلاثين خطوه وبعدها لف يسار عشرين خطوه وهكذا اللين تلقى الكنز
قلت بنفسي مانيب فاضي الحين بعدين ابقرى الخريطه
واقوم اصدقاي رامي وعلاء لاحظوا اسماءهم على ضياع بجزيره ماتجي صح ..
المهم قلت لهم قوموا ترانا ضايعين بجزيره
قالوا وينا فيه ووش صار ووش السالفه
قلت ابد يوم السفينه داعسه طبلونها وينفقع ذاك الكفر وتتقلب فينا وانا نطيت مع الشباك
قالوا وينا فيه .؟؟؟
قلت احنا بجزيره تبعد عن السعوديه 3000كم على خط جده الدمام السريع البحري مرورا باسبانيا وايران
قالوا وش بنسوي
قلت نبي نبني بيت ونعيش اللين نلقى حل ...
واحنا نسولف شفت بنت طايحه بعيد عنا على الشاطئ
قلت ياعيال شوفوا بنت هناك
قال رامي من ذي ؟؟؟
قلت انا اكيد لينا تحتري عدنان يساعدها ..
قال رامي لا انا اتوقع فلونه
قال علاء انا اتوقع الكابتن ماجد <<< على فكره علاء مايتابع افلام كرتون ابد لاتشرهون عليه
المهم رحنا لها قلت لها هيه انتي يابنت قومي صلحي لنا فطور
قامت وناظرت قالت لو تدري من انا ماقلت ذا الكلام
عاد انا قعدت اتذكر ان فيه بنت ركبت القارب ودفعت مية ريال ولا خذت الباقي
قلت بنفسي اكيد هذي هي بنت نعمه وتشخص علينا ...
المهم شوي وجت طيور النورس وقامت تناظرهم وتتكلم معهم
قلت شفتوا هذي لينا
قالت لينا مين ماعرفتوني
قلنا لا من انتي
قالت انا العجوز حقت التايتنك قاعده الحين اتذكر يومني صغيره وشلون نجيت من الغرق
قلت اقول بتروحين معنا نبني بيت ونسكن زي فلونه
قالت لا انا الحين ابكمل الفيلم
قلت اجل الله لايهينك اقعدي على ذا الحصاة وناظري البحر
يمكن يجي احد ويصورك وتصيرين توقيع بالمنتديات
المهم ورحت انا وربعي النشاما
قلت وش رايكم نبني بيت فوق شجره بعيد عن الذيـــــــــابه
قال رامي لا ندور كهف ونسكن فيه احس وامن
قال علاء وش رايكم نسكن بالهوليدي ان ليلتين وبعدها نروح لبيوتنا <<< ماقلت لكم لاتواخذونه
المهم مالكم بالطويله << كل هذا وماطولت اخلص وش صار
قمت وقطعت ورق الشجر وفصلت به ملابس <<< مهوب عاقل موكلي
وقلت لربعي مشينا نكتشف الجزيره ونبني بيت فوق شجره
ومشينا بالجزيره وطلع لنا اسد طبعا خافوا ربعي من اسمائهم اكيد يخافون من قطوا وشلون لو صار اسد
قلت للاسد اسمع انت بتنقلع ولا والله لاخذك على حديقة حيوانات الخرج
قال الاسد لاتكفى كل شي ولا ذا الحديقه من الصبح اللين العشاء البزران يرجمونا فيها
عندك واسطه اخوي هناك وابي انقله لحديقة الرياض
قلت خلاص ابشوفلك واحد اعرفه بحركة النقل
قال الاسد اجل ابشر على خشمي ماراح اضايقكم ابد واذا احد تحرش فيكم بذا الغابه دقوا علي هذا جوالي وعطانا رقمه
بس يوم قال على خشمي اظافره اطول مني يخوف
مشينا لنا شوي وسط الاشجار
وسمعنا اصوات وخيام وشب نيران
قال رامي هذولا الهنود الحمر انتبهوا تراهم ياكلونا
قلت هذاك اول الهنود الحمر اللحين البنقاليين الحمر لانهم مالين البطحاء اكثر من الهنود
قال علاء اتوقع هذي اصوات الناس بماكدونالدز يطلبون عشاء <<< وش انا قايلكم لاتشرهون
المهم واحنا نراقبهم من بعيد ولانشوف زين
الا ورانا واحد فوق راسه عظم
قلت بس هذا وقت الاسد ودقينا عليه جوال مارد دقينا ثانيه مارد
المهم يوم قفلت معنا ابو عظم واقف فوقنا
دقينا على الاسد ردت حرمته اللبوه قالت مين يبيه طبعا بالزئير الناعم يعني صوت اسود
قلت قوليله الواسطه حقت اخوك اللي يبي ينقله
قالت دقوا بعد ساعتين الحين انا بالسوق والجوال معي
قلت ساعتين يعني قد اكلنا ذا الخبل ابو عظم
قلت لازم نشوف لنا صرفه
المهم واكلم ابو عظم قلت وش تبي
قال ابي اكلكم
قلت وبعدين ماراح تستفيد شي عندي لك شي احسن
قال وشو
قلت عندي لك نار ماتطفى ابد اقعد در عليها دوران الين الصبح
عاد هم يحبون يدورون على النار
قال بالله وينها
قلت في مصانع البترول بالجبيل رح هناك
وطس وافتكينا منه
ومشينا بالغابه واتذكر القاروره اللي فيها خريطه واطلع الورقه حقت الخريطه
قلت ياعيال نبي نروح نجيب الكنز
قال علأ .. اول خلونا نتعشا في بيتزا هت وبعدين ندور الكنز << مايحتاج اكتب شي اكيد ماشرهتوا عليه
قلت يالوح خذ ورق شجر وكل ولا كل دود ولا عضلك ثعبان المهم شفلك صرفه
قال اكل ورق شجر شافني زرافه
المهم ونمشي على الخريطه اللين وصلنا جبل
ورقيناه وحنا نرقى دق جوالي رقم غريب شكله بطاقة سوا
يوم رديت قال انا الاسد ابسكر ودق مامعي رصيد
المهم دقيت عليه قلت وينك بغا ابو عظم ياكلنا
قال معليش توني ماخذ عيالي من السوق وعلموني انك داق ودقيت عليك من جوالي الثاني
قلت اخس معك جوالين
قال ايه لزوم ملك الغابه
والثاني عام
قلت ياخواف المهم ترانا فوق جبل ندور الكنز
قال أي كنز الجزيره مافيه كنوز ولا شي انزلوا بسرعه الجبل ذا خطير
قلت ليش وشفيه
قال اخلصوا بس خذوا اول ليموزين وانزلوا
اول ليموزين قلتها بنفسي قلت شكل الاسد يقرب لعلاء خوينا
المهم ورجعنا للشاطئ مره اخرى وجلسنا مع الاسد خوينا
ودقيت على الواسطه ونقلنا اخوه لحديقة الطايف بالردف على الاقل اهون من الخرج
لان الرياض عليه طلب كبير مره لو تخصصه انجليزي ممكن يلقى بالرياض
المهم واحنا جالسين بالشاطئ ونغني مع الاسد
جتنا البنت حقت التايتنك
قالت انتم هيه ناقصنا كومبارس بالفيلم تمثلون معنا
قلت ايه ياليت بس نلقا شي ناكله
يوم رحنا معها الا العالم والتصوير واكل وفله وسفن وبواخر
قلت حلو ضمنا الرجعه للديره
ومثلنا معهم انا كان دوري اقول بس طااااااخ طووووخ كن السفينه صدمت بحصات
ورامي دوره يكتب الاسماء بعد الفيلم اذا انتهى يعني الله يعينه واجد لازم يشكر كل من ساعد على نجاح الفيلم
وعلأ خلوه بس يقول اكشن الحين يبدى التصوير
ورجعونا لاهلنا سالمين غانمين وممثلين بارعين
واللي يبي رقم الاسد تراه معي لاي طارئ بالعالم
خلصت القصه ...
على فكره كم مره قلت المهم احس انها كثيره ؟؟؟؟
22-04-2008, 02:18 AM
التايتنك العربي
العرض العادي
